ភ្នំពេញ៖ ព្រះរាជាណាចក្រកម្ពុជាត្រូវបានទស្សនាវដ្តី និងស្ថាប័នស្រាវជ្រាវដ៏ល្បីល្បាញរបស់សហរដ្ឋអាមេរិក U.S. News & World Report វាយតម្លៃ និងផ្តល់ចំណាត់ថ្នាក់ជា «ប្រទេសដែលមាននិរន្តរភាពដី និងធនធាន (Land and Resource Sustainability) ល្អបំផុតនៅលើពិភពលោក ប្រចាំឆ្នាំ២០២៦»។
យោងតាមការចុះផ្សាយរបស់បណ្តាញសារព័ត៌មាន SEA Infographics កាលពីថ្ងៃទី២៦ ខែមិថុនា ឆ្នាំ២០២៦ បានឱ្យដឹងថា នៅក្នុងរបាយការណ៍សកលនេះ កម្ពុជាបានឈរនៅលំដាប់ថ្នាក់លេខ១ លើពិភពលោក ដោយនាំមុខប្រទេសស្លូវេនី (ចំណាត់ថ្នាក់លេខ២) និងប្រទេសប៉ារ៉ាហ្គាយ (ចំណាត់ថ្នាក់លេខ៣)។ ដោយឡែកសម្រាប់តំបន់អាស៊ីអាគ្នេយ៍វិញ កម្ពុជាបានក្តោបក្តាប់តំណែងកំពូលលេខ១ នេះ ដាច់ដោយឡែក បន្តបន្ទាប់ដោយប្រទេសឡាវ (លេខ២) និងមីយ៉ាន់ម៉ា (លេខ៣)។
ដើម្បីឈានទៅដល់ការផ្តល់ពិន្ទុ និងចំណាត់ថ្នាក់កំពូលនេះ ស្ថាប័ន U.S. News & World Report បានធ្វើការសិក្សា និងផ្អែកលើសូចនាករគន្លឹះចំនួន ៥ រួមមាន៖
- ការកាត់បន្ថយការបញ្ចេញឧស្ម័នកាបូន
- ការទប់ស្កាត់ការកាប់បំផ្លាញព្រៃឈើ
- ផ្ទៃដីតំបន់ការពារធម្មជាតិ
- ពាណិជ្ជកម្មប្រកបដោយនិរន្តរភាព
- វិធានការឆ្លើយតបទៅនឹងកង្វះខាតទឹក។
ការទទួលបានចំណាត់ថ្នាក់លេខ១ ដ៏គួរឱ្យមោទនៈនេះ គឺជាសក្ខីភាពឆ្លុះបញ្ចាំងពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្នុងការគ្រប់គ្រងដីធ្លី ជាពិសេសកិច្ចការពារព្រៃឈើ និងធនធានធម្មជាតិនៅតាមតំបន់ការពារនានា ដែលជាកត្តាចម្បងក្នុងការស្រូបយក និងកាត់បន្ថយការបញ្ចេញឧស្ម័នកាបូន ព្រមទាំងរួមចំណែកយ៉ាងសកម្មក្នុងការទប់ស្កាត់ការប្រែប្រួលអាកាសធាតុសកល។ ការវាយតម្លៃនេះ ត្រូវបានធ្វើឡើងដោយប្រើប្រាស់ទិន្នន័យផ្លូវការ និងច្បាស់លាស់ពីបណ្តាស្ថាប័នអន្តរជាតិឈានមុខ ដូចជា EDGAR, FAO, UNCTAD, EU GHSL និងធនាគារពិភពលោក (World Bank)។
គួរបញ្ជាក់ផងដែរថា ភាពជោគជ័យជាបន្តបន្ទាប់លើឆាកអន្តរជាតិនេះ គឺកើតចេញពីគ្រឹះស្ថានដ៏រឹងមាំ និងចក្ខុវិស័យវែងឆ្ងាយដែលត្រូវបានរៀបចំឡើងជាបន្តបន្ទាប់។ កាលពីថ្ងៃទី១៣ ខែឧសភា ឆ្នាំ២០២៦ មុននេះ បន្តិច កម្ពុbaseក៏ទើបតែទទួលបានចំណាត់ថ្នាក់លេខ១ ជាប្រទេសដែលមានបរិស្ថានធម្មជាតិល្អបំផុតនៅលើពិភពលោក (Best Natural Environment) ម្តងរួចមកហើយ។ មហាសមិទ្ធផលទ្វេដងក្នុងឆ្នាំ២០២៦ នេះ ត្រូវបានគេមើលឃើញថាជាផ្លែផ្កានៃការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងការបន្តវេនដឹកនាំប្រកបដោយថាមពល និងសមត្ថភាពខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការរុញច្រានរបៀបវារៈបរិស្ថាន និងការអភិវឌ្ឍប្រកបដោយនិរន្តរភាពឱ្យលេចធ្លោជាអន្តរជាតិ៕
