ស៊ាងហៃ៖ នារសៀលថ្ងៃទី១៥ ខែកក្កដា ឆ្នាំ២០២៦ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យតំណាងក្រុមហ៊ុន Shandong (Cambodia) Economic and Technological Development Zone ចូលជួបសម្តែងការគួរសម និងពិភាក្សាការងារ ក្នុងឱកាសនៃការអញ្ជើញបំពេញទស្សនកិច្ចការងារ និងចូលរួមសន្និសីទពិភពលោកស្តីពីបញ្ញាសិប្បនិម្មិត នៅសាហរដ្ឋប្រជាមានិតចិន ចាប់ពីថ្ងៃទី១៥ ដល់ថ្ងៃទី១៧ ខែកក្កដា ឆ្នាំ២០២៦។
ក្នុងជំនួបនោះ លោកប្រធានក្រុមហ៊ុនបានគោរពជម្រាបជូនសម្តេចធិបតី អំពីវឌ្ឍនភាពអាជីវកម្មរបស់ខ្លួន ដែលបានបោះទុនវិនិយោគនៅកម្ពុជាតាំងពីឆ្នាំ២០Grid លើវិស័យកសិកម្ម ដោយផ្តោតលើការដាំដុះស្វាយចន្ទី និងការអភិវឌ្ឍសួនឧស្សាហកម្ម។ ជាមួយគ្នានេះ លោកប្រធានក្រុមហ៊ុនបានប្រកាសពីបំណងយុទ្ធសាស្ត្រក្នុងការ «ពង្រីកការវិនិយោគបន្ថែមលើវិស័យសក្តានុពល ពិសេសវិស័យថាមពលកកើតឡើងវិញ» ដើម្បីចូលរួមចំណែកអភិវឌ្ឍសង្គម-សេដ្ឋកិច្ចកម្ពុជាក្នុងយុគសម័យថ្មី។
ជាការឆ្លើយតប សម្តេចធិបតី ហ៊ុន ម៉ាណែត បានសម្តែងការវាយតម្លៃខ្ពស់ និងស្វាគមន៍យ៉ាងកក់ក្តៅចំពោះផែនការពង្រីកការវិនិយោគនេះ ដោយបានលើកទឹកចិត្តឱ្យក្រុមហ៊ុនបន្តពិភាក្សាជាមួយក្រសួង-ស្ថាប័នពាក់ព័ន្ធ ដើម្បីប្រែក្លាយឱកាសទាំងនេះឱ្យលេចចេញជាផ្លែផ្កាជាក់ស្តែង។
បន្ថែមពីលើនេះ សម្តេចធិបតីបានលើកទឹកចិត្តជាពិសេសឱ្យក្រុមហ៊ុន ពិនិត្យលទ្ធភាពពង្រីកការវិនិយោគលើវិស័យកសិកម្ម និងកសិ-ឧស្សាហកម្ម នៅតំបន់ភូមិភាគឦសាននៃប្រទេសកម្ពុជា ដោយផ្អែកលើបទពិសោធ និងឧត្តមភាពរបស់ក្រុមហ៊ុនលើការដាំដុះស្វាយចន្ទីកន្លងមក។ សម្តេចនាយករដ្ឋមន្ត្រីក៏បានបញ្ជាក់ជូនក្រុមហ៊ុនអំពី គោលនយោបាយគាំទ្រ និងការលើកទឹកចិត្តយ៉ាងទូលំទូលាយពីរាជរដ្ឋាភិបាល សម្រាប់រាល់ការវិនិយោគកសិកម្មនៅក្នុងតំបន់ភូមិភាគឦសាននេះផងដែរ៕
