អ្នកផលិតថ្នាំ ៤ក្រុមហ៊ុនជឿជាក់ថា “វ៉ាក់សាំង” អាចទប់ទល់កូវីដក្លាយពូជបាន ត្រៀមប្រកាសលទ្ធផលច្បាស់លាស់ ឆាប់ៗនេះ
បរទេស៖ អ្នកផលិតវេជ្ជភណ្ឌ និងឱសថ យ៉ាងតិច ៤ក្រុមហ៊ុន ជឿជាក់ថា វ៉ាក់សាំងការពារមេរោគវីរុសកូរ៉ូណាប្រភេទថ្មី ដែលខាងក្រុមហ៊ុនអភិវឌ្ឍបាននោះ មានប្រសិទ្ធភាពគ្រប់គ្រាន់ក្នុងការការពារ “មេរោគកូវីដ-១៩ក្លាយពូជ” ដែលអាចចម្លងទៅមនុស្សបានយ៉ាងងាយជាងមុន និងកំពុងឆ្លងរាលដាលយ៉ាងខ្លាំងក្លានៅក្នុងចក្រភពអង់គ្លេសនោះ និងបច្ចុប្បន្នកំពុងស្ថិតក្នុងដំណាក់កាលសាកល្បងបន្ថែម ដោយរំពឹងថា នឹងប្រកាសលទ្ធផល ក្នុងអំឡុងពេល ២-៣សប្ដាហ៍ទៀត។
លោក Ugur Sahin នាយកប្រតិបត្តិរបស់ក្រុមហ៊ុន BioNtech អ្នកផលិតឱសថ របស់ប្រទេសអាល្លឺម៉ង់ ដែលបានសហការអភិវឌ្ឍវ៉ាក់សាំងប្រឆាំងកូវីដ-១៩ ជាមួយក្រុមហ៊ុន Pfizer របស់ប្រទេសអាមេរិកនោះ បានចេញមកសម្ដែងភាពជឿជាក់ កាលពីថ្ងៃទី២២ ធ្នូថា វ៉ាក់សាំងប្រភេទ mRNA របស់ក្រុមហ៊ុន នឹងហុចលទ្ធផលយ៉ាងល្អ ក្នុងការការពារមេរោគកូវីដក្លាយពូជ។
ចំណែកក្រុមហ៊ុន Moderna Inc, CureVac និង AstraZeneca ក៏មានភាពជឿជាក់ដូចគ្នាថា វ៉ាក់សាំងរបស់ខ្លួន អាចទប់ស្កាត់វីរុសកូវីដក្លាយពូជ ដែលកំពុងធ្វើឱ្យប្រទេសអង់គ្លេសភិតភ័យច្របូកច្របល់ និងធ្វើឱ្យប្រទេសជាច្រើន ត្រូវប្រកាសហាមការធ្វើដំណើរ ផ្អាកការដឹកជញ្ជូនទំនិញរវាងចក្រភពអង់គ្លេសនឹងអឺរ៉ុប និងហេតុការណ៍នេះ កំពុងប្រឈមក្នុងការធ្វើឱ្យប្រទេសអង់គ្លេស ត្រូវកាត់ផ្ដាច់ពីសហគមន៍ពិភពលោកកាន់តែខ្លាំងឡើងទៀតផង។
លោក Sahin បានផ្ដល់សម្ភាសជាមួយបណ្ដាញសារព័ត៌មានថា “ក្នុងខាងវិទ្យាសាស្ត្រ មានភាពអាចទៅរួចខ្ពស់ខ្លាំងណាស់ ដែលការឆ្លើយតបរបស់ព័ន្ធប្រឆាំងជំងឺក្នុងរាងកាយមនុស្ស ដែលកើតឡើងដោយសារវ៉ាក់សាំងមួយនេះ នឹងអាចចាត់ការវីរុសក្លាយពូជនោះបាន”
លោកបានបញ្ជាក់ថា អាចនឹងត្រូវប្រើពេលប្រមាណជា ២សប្ដាហ៍ទៀត ដើម្បីសិក្សា និងរួបរួមទិន្នន័យ មុននឹងទទួលបានចម្លើយដែលពិតប្រាកដ។ លោកបានថ្លែងទៀតថា “វ៉ាក់សាំងរបស់យើង មានអាស៊ីតអាមីណូ ច្រើនជាង ១ ២៧០អង្គ និងមានត្រឹមតែ ៩អង្គប៉ុណ្ណោះ ដែលប្រែប្រួល(ក្នុងវីរុសក្លាយពូជ) នោះមានន័យថា ប្រូតេអ៊ីន ៩៩%ទៀត នៅរក្សាដូចដើម”
មេរោគកូវីដក្លាយពូជ ដែលមានឈ្មោះថា “B.1.1.7” នោះ អាចចម្លងសាយភាយបានងាយជាងមុន ដល់ទៅ ៧០% និងគ្រោះថ្នាក់ខ្លាំងជាងគេបំផុត សម្រាប់កុមារ។
លោក Sahin បានបញ្ជាក់ថា បើសិនជាមានភាពចាំបាច់មែនទែននោះ អ្នកវិទ្យាសាស្ត្រ នឹងអាចកែច្នៃវ៉ាក់សាំងប្រភេទ mRNA ឱ្យចូលគ្នាជាមួយប្រូតេអ៊ីនរបស់វីរុសក្លាយពូជនោះ បានក្នុងរយៈពេលត្រឹមតែ ៦សប្ដាហ៍ប៉ុណ្ណោះ ដែលវាខុសប្លែកពីវ៉ាក់សាំងបែបពីដើម ដែលនឹងត្រូវមានដំណាក់កាលស្មុគស្មាញជាង។
វ៉ាក់សាំងរបស់ ហ្វ៉ៃហ្ស៊ើរ/បៃអូអេនថេក, ម៉ូឌើណា និង CureVac សុទ្ធតែប្រើតិចណូឡូជីប្រភេទ mRNA ក្នុងខណៈដែលវ៉ាក់សាំងរបស់ អេស្ត្រាហ្សេនេកា បានប្រើប្រាស់ អាឌីណូវីរុស ដែលរកឃើញនៅក្នុងសត្វស្វា ឈីមពិនហ្ស៊ី ដើម្បីបញ្ជូនសារធាតុពូជពីវីរុសកូរ៉ូណា ទៅជំរុញឱ្យរាងកាយមនុស្ស សាងប្រព័ន្ធប្រឆាំងជំងឺ។
អង្គការសុខភាពពិភពលោក ឬ WHO ត្រៀមបើកកិច្ចប្រជុំ ដើម្បីពិភាក្សាអំពីយុទ្ធសាស្ត្រទប់ទល់វីរុសកូវីដ-១៩ក្លាយពូជ តែមិនទាន់បានបញ្ជាក់ពីពេលវេលាពិតប្រាកដនៅឡើយ៕
ប្រភព៖ ទីភ្នាក់ងារព័ត៌មានរ៉យទ័រ
ប្រែ និងសម្រួលដោយ តាវ៉ែនតា
#អរគុណសន្តិភាព
