គ្រូពេទ្យបញ្ជាក់ថា លោកដូណាល់ ត្រាំ អាចចេញពីមន្ទីរពេទ្យ ទៅកាន់សេតវិមានវិញនៅសប្ដាហ៍នេះ
វ៉ាស៊ីនតោន៖ យោងតាមការចេញផ្សាយរបស់សារព័ត៌មាន Reuters នៅថ្ងៃនេះបានឱ្យដឹងថា ក្រុមគ្រូពេទ្យព្យាបាលប្រធានាធិបតីអាមេរិកលោក ដូណាល់ ត្រាំ ដែលមានជំងឺកូវីដ-១៩ បាននិងកំពុងតាមដានស្ថានភាពសួតរបស់លោក បន្ទាប់ពីការទទួលអុកស៊ីសែនបន្ថែមប៉ុន្មានម៉ោងប៉ុណ្ណោះ មុននឹងលោកបង្កភាពភ្ញាក់ផ្អើលដល់អ្នកគាំទ្រ នៅខាងក្រៅមន្ទីរពេទ្យ ដោយជិះនៅក្នុងរថយន្ដមួយគ្រឿង ខណៈគ្រូពេទ្យប្រចាំខ្លួនលោក ត្រាំ បានអះអាងថា ប្រធានាធិបតីរូបនេះអាចចាកចេញពីមន្ទីរពេទ្យ ទៅកាន់សេតវិមានវិញ ដើម្បីទទួលការព្យបាលបន្តនៅក្នុងសប្តាហ៍នេះ។
លោក ដូណាល់ ត្រាំ មានអាយុ ៧៤ឆ្នាំបានពាក់ម៉ាស និងលោកដៃគ្រវីដាក់អ្នកគាំទ្រ ដោយអង្គុយក្នុងរថយន្ត SUV នៅខាងមុខមន្ទីរពេទ្យយោធា Walter Reed National Military Medical Center ស្របពេលអ្នកគាំទ្រគ្រវីទង់គាំទ្រលោក ត្រាំ ជាមួយការស្រែកច្រៀងពាក្យស្លោក “USA! USA!។ លោក ដូណាល់ ត្រាំ កំពុងទទួលការព្យាបាលកូវីដ-១៩ ដោយប្រើថ្នាំ Remdesivir និង dexamethasone។
វេជ្ជបណ្ឌិតប្រចាំកាយលោក ត្រាំ គឺលោក Sean Conley បានទទួលស្គាល់ថា កម្រិតអុកស៊ីសែននៅក្នុងឈាមរបស់លោក ត្រាំ បានធ្លាក់ចុះពិតមែនកាលពីប៉ុន្មានថ្ងៃមុន និងឡើងកម្ដៅក្នុងខ្លួនខ្លាំងកាលពីព្រឹកថ្ងៃសុក្រ (ពេលវេលានៅវ៉ាស៊ីនតោន)។ ប៉ុន្តែលោក Conley ក៏បានបញ្ជាក់ដែរថា ស្ថានភាពសុខភាពលោក ត្រាំ ចាប់ផ្ដើមល្អប្រសើរឡើងវិញនៅថ្ងៃអាទិត្យ ហើយអាចនឹងត្រូវអុនញ្ញាតឱ្យចាកចេញពីមន្ទីរពេទ្យ នៅថ្ងៃចន្ទសប្ដាហ៍នេះ (ម៉ោងនៅវ៉ាស៊ីនតោន) ដើម្បីទៅព្យាបាលបន្តនៅក្នុងសេតវិមាន៕
#អរគុណសន្តិភាព
