ឯកឧត្ដម ហាក់ សុខមករា អភិបាលរងខេត្តកណ្ដាល បានអញ្ជើញចុះពិនិត្យការស្ថាបនាផ្លូវជាតិលេខ២ និងដាល់ប្រព័ន្ធលូក្នុងភូមិសាស្ត្រក្រុងតាខ្មៅ
![](https://i0.wp.com/orkunsantepheap.com/wp-content/uploads/2022/11/315436082_448875854087429_2297568460640148034_n.jpg?fit=1000%2C667&ssl=1)
ខេត្តកណ្ដាល៖ ព្រឹកថ្ងៃទី២០ ខែវិច្ឆិកា ឆ្នាំ២០២២ ឯកឧត្ដម ហាក់ សុខមករា អភិបាលរងខេត្តកណ្ដាល តំណាងឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល បានអញ្ជើញចុះពិនិត្យការស្ថាបនាផ្លូវជាតិលេខ២ និងដាល់ប្រព័ន្ធលូ ក្នុងភូមិសាស្ត្រក្រុងតាខ្មៅ។
ក្នុងឱកាសចុះពិនិត្យនេះដែរ ឯកឧត្តមអភិបាលរងខេត្ត បានណែនាំដល់អាជ្ញាធរមូលដ្ឋាន ត្រូវធ្វើការសហការជាមួយក្រុមហ៊ុនសាងសង់ ក្នុងការសម្របសម្រួលរាល់បញ្ហានានាដែលមាននៅក្នុងដែនសមត្ថកិច្ចរបស់ខ្លួន ពិសេសត្រូវសហការក្នុងការសម្រួលចរាចរណ៍ជូនបងប្អូនប្រជាពលរដ្ឋដែលកំពុងធ្វើដំណើរក្នុងភូមិសាស្ត្រដែលកំពុងស្ថាបនានេះ ដើម្បីបញ្ជៀសការកក់ស្ទះចរាចរណ៍ផងដែរ។
ជាមួយគ្នានេះផងដែរ ឯកឧត្តមអភិបាលរងខេត្ត បានស្នើដល់ក្រុមហ៊ុនសាងសង់ សូមពន្លឿនការសាងសង់ឱ្យបានឆាប់រហ័ស ហើយក្នុងករណីមានបញ្ហាប្រឈម ក្នុងពេលសាងសង់ សុំសហការជាមួយអាជ្ញាធរសង្កាត់ ក្រុង ដើម្បីធ្វើការសម្របសម្រួល និងពន្លឿនដល់ការសាងសង់ឱ្យបានរួចរាល់ជាស្ថាពរតាមការគ្រោងទុក៕