ដកទាហានអាមេរិកាំង?
អាមេរិកាំង៖ ផែនការរបស់លោកប្រធានាធិបតី ដូណាល់ ត្រាំ ដែលប្រុងដកទាហានអាមេរិកាំងចេញពីប្រទេសអាហ្វហ្គានីស្ថាន នឹងរឹតតែដុតបញ្ឆេះរលកនៃភាពធ្ងន់ធ្ងរឡើងថែមទៀត ព្រោះនឹងធ្វើឱ្យក្រុមឧទ្ទាមក្បាលរឹង “តាលីបង់” កាន់តែគឃ្លើនខ្លាំងឡើង។
តែក៏នឹងមានវិធានការថ្មីៗទៀត កើតចេញពីអនាគតប្រធានាធិបតីថ្មីរបស់សហរដ្ឋអាមេរិក លោកចូ បៃដិន ដែលអាចនឹងទាញបញ្ឈប់ក្ដីព្យាយាមរបស់តាលីបង់ ដែលសង្ឃឹមគ្រងអំណាចនោះបាន។
សកម្មភាពថ្មីចុងក្រោយបំផុត ក៏គឺ ទាហានអាមេរិកាំង ចំនួន ២ ០០០នាក់ នឹងត្រូវដកចេញពីប្រទេសអាហ្វហ្គានីស្ថាន នៅថ្ងៃទី១៥ មករា ឆ្នាំក្រោយ ដែលក៏នៅសល់មិនដល់ ១សប្ដាហ៍ តមកទៀត អនាគតប្រធានាធិបតីថ្មី របស់សហរដ្ឋអាមេរិក នឹងស្បថចូលកាន់តំណែង នៅថ្ងៃទី២០ ខែ-ឆ្នាំដូចគ្នា តែនៅក្នុងប្រទេសអាហ្វហ្គានីស្ថាន ក៏នឹងនៅសល់ទាហានអាមេរិកាំង តែ ២ ៥០០នាក់ប៉ុណ្ណោះ។
ក្រសួងការពារប្រទេសសហរដ្ឋអាមេរិក ជាអ្នកបង្ហើបឱ្យដឹងអំពីផែនការនេះកាលពីសប្ដាហ៍មុន ក្រោយពីលោកប្រធានាធិបតី ត្រាំ បានសន្យាថា នឹងបញ្ចប់សង្គ្រាមដែលសម្លាប់ជីវិតទាហានអាមេរិកាំង អស់ជាង ២ ៥០០នាក់ និងថែមទាំងបាត់បង់ថវិកាអស់ ១លានលានដុល្លារមួយនេះ។
លោក និឈែងក៍ ម៉ត់វ៉ានី អគ្គនាយករងអង្គភាពវិភាគ និងវាយតម្លៃស្ថានការណ៍អាហ្វហ្គានីស្ថាន បានប្រាប់ថា ក្ដីសង្ឃឹម ដែលថារដ្ឋបាលថ្មីរបស់សហរដ្ឋអាមេរិក ក្រោមការដឹកនាំរបស់លោក ចូ បៃដិន ប្រហែលជាមិនប្រញាប់ប្រញាល់ដកខ្លួនចេញនោះ ប្រហែលជានឹងសាងសម្ពាធយ៉ាងធ្ងន់មួយ ទៅលើក្រុមឧទ្ទាមតាលីបង់។ សូមបញ្ជាក់ថា ការដកទាហានអាមេរិកាំង មិនបានជួយឱ្យលោកប្រធានាធិបតី អាចរ៉ាហ្វ ហ្គានី បានទទួលអ្វីច្រើននោះទេ ជាពិសេស ទាហានអាហ្វហ្គានីស្ថាន ព្រោះក្រុមតាលីបង់ ដឹងថា រង់ចាំឱ្យសហរដ្ឋអាមេរិកថយចេញទៅហើយ ពួកគេក៏នឹងឈានឡើងឆ្ពោះទៅរកអំណាចតែម្ដង។
ចំណែកលោកស្រី វែនដា ហ្វេលបាប-ប្រោន នៃស្ថាប័នប្រ៊ុកឃីង បានប្រាប់ថា ទាហានអាមេរិកាំង ដែលនៅសល់ ២ ៥០០នាក់ ក្នុងខែមករា ឆ្នាំក្រោយនោះ បើសហរដ្ឋអាមេរិកត្រូវការនៅបន្ត ២-៣ខែទៀតនោះ ក្រុមតាលីបង់ក៏នឹងចាំត្របាក់លេបមិនខាន តែការងារលំបាក អាចនឹងកើតឡើង បើសិនមេដឹកនាំសហរដ្ឋអាមេរិកថ្មី លោកចូ បៃដិន ជ្រើសរើសក្នុងការឱ្យទាហានអាមេរិកាំង នៅបន្តទៀតនោះ ក្រោយខែឧសភា ឆ្នាំក្រោយ អាចនិយាយថា បើសហរដ្ឋអាមេរិក សុំនៅតទៀត ៥ឆ្នាំនោះ ប្រហែលជាមិនសប្បាយខ្លួនទេសម្រាប់តាលីបង់។
ខណៈដែលលោក អាត់តា នូរី អ្នកវិភាគនយោបាយអាហ្វហ្គានីស្ថាន ប្រាប់ថា មិនថាជាលោកត្រាំ ដែលកំពុងផុតអាណត្តិ ឬលោកបៃដិន ដែលនឹងឡើងថ្មីនោះទេ វានៅតែមានផលប៉ះពាល់ដល់សមរភូមិប្រយុទ្ធនៅក្នុងអាហ្វហ្គានីស្ថាន តែក៏ប្រហែលជាមិនមែនជាការទទួលខុសត្រូវ របស់សហរដ្ឋអាមេរិកដែរ ព្រោះសង្គ្រាមប្រឆាំងភេរវកម្មនេះ មិនមែនបញ្ចប់ត្រឹមតែនៅក្នុងអាហ្វហ្គានីស្ថាននោះទេ។
លោកអគ្គនាយករង ម៉ត់វ៉ានី បានប្រាប់ទៀតថា តាមផ្លូវប្រតិបត្តិវិញ រដ្ឋបាលក្រុងវ៉ាស៊ីនតោន ត្រូវការរក្សាកងកម្លាំងទុក តែមិនមែនកងកម្លាំងខ្នាតធំនោះទេ ជាកម្លាំងកងទាហានខ្នាតតូច តែជាកម្លាំងទាហានប្រយុទ្ធ និងការងារផ្នែកព័ត៌មានសម្ងាត់។
ភាពធ្ងន់ធ្ងរ នៅតែកើតមានឡើងជាបន្តបន្ទាប់ ក្នុងអំឡុងច្រើនខែកន្លងមក ទោះជារដ្ឋបាលអាហ្វហ្គានីស្ថាន ជាមួយក្រុមតាលីបង់ បានចរចាសន្តិភាពគ្នា នៅឯប្រទេសកាតា កាលពីថ្ងៃ១២ កញ្ញាកន្លងទៅក៏ដោយ តែក្រុមតាលីបង់ក៏នៅតែបើកឆាកវាយលុកជាបន្តបន្ទាប់ គោលដៅគឺ ទាហានអាហ្វហ្គានីស្ថានទូទាំងប្រទេស និងថែមទាំងត្រូវរងការរិះគន់ថា នៅពីក្រោយការវាយប្រហារស្ថាប័នការសិក្សានៅក្នុងទីក្រុងកាប៊ូល ដែលធ្វើឱ្យនិស្សិតជាច្រើនសិបនាក់បានស្លាប់។ ក្រៅពីនោះ ក៏នៅមានការបាញ់កម្ទេចទីក្រុងកាប៊ូល កាលពីថ្ងៃសៅរ៍ ទី២១ វិច្ឆិកា កន្លងទៅថ្មីៗ ដែលធ្វើឱ្យមានមនុស្សស្លាប់ ៨នាក់ និងរងរបួស ៣១នាក់ទៀតផង។
តែមិនមែនមានតែហេតុការណ៍បង្ហូរឈាមប៉ុណ្ណោះទេ ដែលអាជ្ញាធរអាហ្វហ្គានីស្ថានព្រួយបារម្ភនោះ តែវាថែមទាំងនាំឆ្ពោះទៅរកគោលជំហររបស់ក្រុមតាលីបង់ នៅលើតុចរចាក្នុងទីក្រុងដូហា ដោយការចរចាសន្តិភាព នៅតែរអាក់រអួលជាច្រើនសប្ដាហ៍ទៀតផង។ លោកអគ្គនាយករង ម៉ត់វ៉ានី បានប្រាប់ថា ក្រុមតាលីបង់ ដឹងថា អាមេរិក នឹងដកកម្លាំងទាហានចេញ នៅសល់តែសម្ព័ន្ធមិត្ត ដែលត្រូវឡោមព័ន្ធ និងទន់ជ្រាយប៉ុណ្ណោះ និងថែមទាំងមានចំណុចខ្សោយខាងជម្រើសផ្នែកនយោបាយ និងយោធាទៀតផង។
អ្នកតំណាងចរចាម្នាក់ របស់រដ្ឋបាលអាហ្វហ្គានីស្ថាន ប្រាប់ថា មេដឹកនាំសហរដ្ឋអាមេរិក ប្រញាប់ដកទាហានលឿនពេក ទើបរឹតតែធ្វើឱ្យមានអារម្មណ៍ថ្មីៗចំពោះការចរចាសន្តិភាព ជាពិសេសជាមួយភាគីតាលីបង់ ដែលគិតថា ពិភពលោកកំពុងបោះបង់ចោលអាហ្វហ្គានីស្ថាន ដែលរឿងនោះ អាចជាហេតុផលសំខាន់ ដែលយើងមិនបានមើលឃើញ ការសម្រុះសម្រួលពីភាគីតាលីបង់ ទាំងដែលតាលីបង់ ជាអ្នកចាប់ផ្ដើមការចរចាសន្តិភាព ក្រោយពីទៅចុះហត្ថលេខាលើកិច្ចព្រមព្រៀងជាក្រុងវ៉ាស៊ីនតោន កាលពីខែកុម្ភៈ កន្លងទៅ ដើម្បីក្រាលផ្លូវឆ្ពោះទៅរកការដកកងទាហានបរទេសទាំងអស់ ចេញពីអាហ្វហ្គានីស្ថាន ក្នុងអំឡុងខែឧសភា ឆ្នាំក្រោយ។
ផ្ទុយទៅវិញ ក្រុមតាលីបង់ បានសន្យាថា នឹងមិនវាយប្រហារទាហានអាមេរិកាំង និងថែមទាំងនឹងហាមប្រាមក្រុមឧទ្ទាមក្បាលរឹង អាល់កៃដា និងអៃអេស មិនឱ្យធ្វើប្រតិបត្តិការនៅក្នុងអាហ្វហ្គានីស្ថានទៀតផង។
ខណៈដែលរដ្ឋបាលអាហ្វហ្គានីស្ថាន បានផ្ញើសេចក្ដីសង្ឃឹមនៅលើអនាគតប្រធានាធិបតី ចូ បៃដិន តែក្រុមតាលីបង់បានបញ្ជាក់ច្បាស់ថា ឱ្យមេដឹកនាំសហរដ្ឋអាមេរិកបច្ចុប្បន្ន ធ្វើតាមអ្វីដែលបានសន្យាឱ្យចប់សព្វគ្រប់ ព្រោះនោះគឺ យន្តការដែលមានប្រសិទ្ធភាព និងសមហេតុសមផលបំផុត ក្នុងអ្វីដែលនឹងបញ្ចប់ទំនាស់ទាំងឡាយទាំងពួងនៅក្នុងប្រទេសអាហ្វហ្គានីស្ថាន៕
ប្រភព៖ សារព័ត៌មានបរទេស
#អរគុណសន្តិភាព
