រាជរដ្ឋាភិបាលផ្ដល់ជូនពូជស្រូវ និងដំណាំ ដល់កសិករ ៥៥៨គ្រួសារ នៅស្រុកកណ្តាលស្ទឹង បន្ទាប់ពីរងផលប៉ះពាល់ដោយសារទឹកជំនន់
![](https://i0.wp.com/orkunsantepheap.com/wp-content/uploads/2021/12/photo_2021-12-02_09-18-53.jpg?fit=900%2C600&ssl=1)
កណ្ដាល៖ ប្រជាកសិករ ដែលទទួលរងផលប៉ះពាល់ជន់លិចដំណាំស្រូវដោយជំនន់ទឹកភ្លៀង ឆ្នាំ២០២១ ចំនួន៥៥៨គ្រួសារ ក្នុងឃុំដើមឫស ស្រុកកណ្តាលស្ទឹង ខេត្តកណ្តាល នៅថ្ងៃទី០១ ខែធ្នូ ឆ្នាំ២០២១ បានទទួលគ្រាប់ពូជស្រូវ និងគ្រាប់ពូដំណាំពីរាជរដ្ឋាភិបាល ដោយប្រើប្រាស់នូវប្រព័ន្ធស្បៀងបម្រុង កម្ពុជា(ប.ស.ប.ក) តាមរយៈក្រសួងសេដ្ឋកិច្ច និងហិរញ្ញវត្ថុ និងរដ្ឋបាលខេត្តកណ្ដាល។
![](https://i0.wp.com/orkunsantepheap.com/wp-content/uploads/2021/12/photo_2021-12-02_09-18-40.jpg?resize=900%2C600&ssl=1)
ឯកឧត្តម គង់ សោភ័ណ្ឌ អភិបាលខេត្តកណ្ដាល បានលើកឡើងថា វិស័យកសិកម្ម គឺជាវិស័យដ៏ចម្បងមួយដែលរាជរដ្ឋាភិបាល បាន និងកំពុងយកចិត្តទុកដាក់សម្រាប់ជួយ លើកកម្ពស់កំណើនសេដ្ឋកិច្ចជាតិ និងគុណភាពជីវភាពប្រជាពលរដ្ឋនៅទូទាំងប្រទេស ដោយសារប្រជាពលរដ្ឋភាគច្រើនជាកសិករប្រកបមុខរបរជាកសិកម្ម ហើយខេត្តកណ្តាល មានប្រជាពលរដ្ឋប្រកបមុខរបរជាកសិកម្មប្រមាណ៥០.៥ភាគរយ។
![](https://i0.wp.com/orkunsantepheap.com/wp-content/uploads/2021/12/photo_2021-12-02_09-18-58.jpg?resize=900%2C600&ssl=1)
ក្នុងឱកាសនោះ ឯកឧត្តមបណ្ឌិត វង់ សណ្តាប់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានចូលរួមសោកស្តាយ ចំពោះការបាត់បង់ខូចខាតទ្រព្យសម្បត្តិ រួមទាំងដំណាំ ស្រូវ និងដំណាំរួមផ្សំផ្សេងៗ ដោយសារជំនន់ទឹកភ្លៀងស្ទឹងព្រែកត្នោតកន្លងមក ដែលនេះជា ការលំបាកមួយបន្ថែមលើការលំបាកនានា ដែលបងប្អូនជួបប្រទះនៅក្នុងអំឡុងពេលនៃការ ឆ្លងរាតត្បាតជំងឺកូវីដ-១៩ ជិតពីរឆ្នាំកន្លងមកនេះ៕