គ្រួសារជួបការលំបាក និងងាយរងគ្រោះ នៅខេត្តកំពង់ឆ្នាំង ១៥០គ្រួសារ ទទួលបានអំណោយមនុស្សធម៌ពីកាកបាទក្រហមកម្ពុជា
![](https://i0.wp.com/orkunsantepheap.com/wp-content/uploads/2021/11/427A9996-B042-484B-8ADF-2602BF6.jpeg?fit=900%2C539&ssl=1)
ខេត្តកំពង់ឆ្នាំង ៖ ប្រជាពលរដ្ឋ ចាស់ជរាគ្មានទីពឹង ស្ត្រីមេម៉ាយកូនច្រើន កុមារកំព្រា ជនពិការ និង អ្នកមានជំងឺរ៉ាំរ៉ៃ ចំនួន ១៥០គ្រូសារ នៅឃុំត្រពាំងចាន់ ឃុំចក ឃុំពពេល និងឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង ទទួលបានអំណោយមនុស្សធម៌ពីសាខាកាកបាទក្រហមកម្ពុជាខេត្ត។
![](https://i0.wp.com/orkunsantepheap.com/wp-content/uploads/2021/11/6ECE58D0-C899-4E05-8009-BFFFB08.jpeg?resize=900%2C900&ssl=1)
សម្ដេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង និងជាអនុប្រធានអចិន្ត្រៃយ៍កាកបាទក្រហមកម្ពុជា នៅថ្ងៃទី០៣ ខែវិច្ឆិកា ឆ្នាំ២០២១ បាននាំយកអំណោយមនុស្សធម៌កាកបាទក្រហមកម្ពុជា រូមមាន អង្ករ២៥ គីឡូក្រាម, មី១កេស, ត្រីខកំប៉ុង១យួរ , ឃីត១កញ្ចប់ (មុង១ សារុង១ ក្រមា១ ភួយ១) និងថវិកា ២ម៉ឺនរៀល ហើយព្រមជាមួយគ្នានោះ សម្ដេចចៅហ្វាវាំង ក៏បានបន្ថែមនូវថវិកាផ្ទាល់ខ្លួន ចំនួន ៥ម៉ឺនរៀល ក្នុងមួយគ្រួសារៗ ដើម្បីទុកប្រើប្រាស់។
![](https://i0.wp.com/orkunsantepheap.com/wp-content/uploads/2021/11/74740C2D-450C-4001-A8E1-DCA09B2.jpeg?resize=834%2C600&ssl=1)
នៅក្នុងពិធីនោះ សម្ដេចចៅហ្វាវាំង គង់ សំអុល បានពាំនាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានផ្ដាំផ្ញើសួរសុខទុក្ខក្តីនឹករលឹកការស្រឡាញ់យ៉ាងជ្រាលជ្រៅ និងគិតគូរជានិច្ចចំពោះសុខទុក្ខរបស់ប្រជាពលរដ្ឋទាំងអស់ ដែលមានជីវភាពក្រីក្រ ចាស់ជរាគ្មានទីពឹង ស្ត្រីមេម៉ាយមានកូនច្រើន កុមារកំព្រា ជនពិការ អ្នកមានជំងឺរ៉ាំរ៉ៃ និង ជួបគ្រោះទឹកជំនន់ជាដើម៕
![](https://i0.wp.com/orkunsantepheap.com/wp-content/uploads/2021/11/427A9996-B042-484B-8ADF-2602BF6.jpeg?resize=900%2C539&ssl=1)